"SMJERĆ JE KÓNC ŽIWJENJA,
ALE NIC SKUTKOWANJA"

• Jutry lěta 1946 wotkrychu serbscy studenća składnostnje swojeho prěnjeho powójnskeho zetkanja při Křižnej cyrkwi w Radworju wopomnjensku taflu za Alojsa Andrickeho.
• Na jeho posmjertninach, dnja 3. februara, wopominaja kóždolětnje serbscy młodostni, studenća a akademikojo Alojsa Andrickeho. Tohodla njeporadźi so w NDRskim času jeho wopominanju zadźěwać. Za tehdyšich mócnarjow běše to problem: Serba jako antifašistiskeho wojowarja drje bychu za swoju propagandu wužić móhli, nic pak katolskeho měšnika.
• Serbscy wučerjo spytachu šulerjam přeco zaso wosobinu Alojsa Andrickeho předstajić.
• W lěće 1967 bě w Ludowym nakładnistwje Domowina prěni raz biografija Alojsa Andrickeho, spisana wot serbskeje spisowaćelki Marje Kubašec, wušła. Nakład bě spěšnje wupředaty.
  Skrótšenu biografiju w němskej rěči wuda Berlinske nakładnistwo Union-Verlag w lěće 1974 w rjedźe "Christ und die Welt".
• Na nócnym modlenju serbskeje dekanatneje młodźiny w nocy wot 12. na 13. měrca 1983 w Chrósčanskej cyrkwi wužiwachu so rozpominanja Alojsa Andrickeho jako nastorki za meditaciju.
• Po božej mši nócneho modlenja wot 31. měrca na 1. apryl 1984 w Chrósćicach donjesechu w zažnych rańšich hodźinach młodostni swjaty křiž na hrodźišćo w Kukowje a jón tam postajichu. Z toho časa bu Kukowske hrodźišćo wuznamne zetkanišćo katolskeje serbskeje młodźiny. Napis na křižu je wuwzaty z primicneho swjećatka Alojsa Andrickeho.
• Wot 1984 je w něhdyšej Radworskej farje pěstowarnja "Dom Alojsa Andrickeho", zaměstnjena. Wšědnje wopytuje 75 pěstowarskich dźěći dźěćace přebywanišćo. Je to jenički katolski serbski dźěćacy dom.
• Tohorunja w lěće 1984 připrawi so na ródnym domje Alojsa Andrickeho w Radworju wopomnjenska tafla, kotruž je Werner Juza zhotowił.
• Města kaž Budyšin a Drježdźany pomjenowachu dróhu po Alojsu Andrickim.
• Nowy nastork wuńdźe ze serbskeho studentstwa na swjatkownym zetkanju lěta 1988. Nyšpor w Křižnej cyrkwi w Radworju, akademija a wustajeńca wo Alojsu Andrickim kaž tež zabawa z wosadnej młodźinu namakachu njewšědnje sylny wothłós. Studenća namołwichu so wo zbóžnoprajenje Alojsa Andrickeho modlić.

50. POSMJERTNINY

• Na 50. posmjertninach kapłana Alojsa Andrickeho dnja 3. februara 1993 wobdźěli so něhdźe 130 serbskich putnikow na božej mši w Dachauje. Tute putnikowanje zahaji wšědne modlenje w cyrkwjach a swójbach wo jeho zbóžnoprajenje. Putnicy zawostajichu w muzeju něhdyšeho kaceta wopomnjensku taflu za Alojsa Andrickeho.
• Sotře Alojsa Andrickeho, Marja Rječcyna a Marta Hantušowa (wotlěwa), při wopomnjenskej tafli
• Tohorunja w februaru 1993 předstaji lajska dźiwadłowa skupina z Chrósćic we wšěch serbskich wosadach hru wo Alojsu Andrickim "Djaboł hraje z ludźimi", kotruž je dr. Achim Nawka napisał.
• 1996 a 1997 přewjedźechu wšelake serbske srjedźne šule a Serbski gymnazij w Budyšinje projektne dny wo Alojsu Andrickim.
• 12. awgusta 1997 wobdźěli so 54 serbskich młodostnych - ducy na swětowe zetkanje młodźiny z bamžom Janom Pawołom II. w Parisu - w karmelitiskim klóštrje w Dachauje na božej mši k wopomnjeću Alojsa Andrickeho pod temu "Eucharistija a swoboda".
• Towarstwo Cyrila a Metoda z.t. (TCM) je wot lěta 1996 zběrało a přihotowało podłožki za proces zbóžnoprajenja Alojsa Andrickeho.
• 27. januara 1998 wěnowaše "Załožba Sakske wopomnišća k spominanju na wopory politiskeje namocy" zhromadnje z "Komitejom Mnichowske naměsto z.t." w Drježdźanach swoje wopomnjeće na wopory nacionalsocializma kapłanej Alojskej Andrickemu a čěskej žurnalistce Mileni Jesenskej. Na tutym zarjadowanju porěčachu prof. dr. Hans Joachim Meyer, sakski statny minister za wědomosć a wuměłstwo, farar dr. Hilmar Günther, předsyda Komiteja Mnichowske naměsto z.t., a Radworski farar Šćěpan Delan.

60. POSMJERTNINY

• Dnja 3. februara 2003 podachu so něhdźe 50 Serbow do něhdyšeho koncentraciskeho lěhwa w Dachauje. (Hlej Katolski Posoł z dnja 9. 2. 2003, strona 37 (*.pdf-dataja)